گه‌ڕانه‌وه‌ بۆ خه‌ونی تاته‌به‌رد

یوسف عیزه‌دین

)بۆ "هاژه‌ " که‌نه‌یده‌ویست بگه‌ڕێته‌وه‌ بۆ نێو دره‌خته‌میتاڵییه‌کان(‌ پێش ئه‌وه‌ى ژانتا شلۆقه‌كانى زه‌مه‌نێک بپێچینه‌وه‌و نه‌رمترین پێڵاوی رۆژگارێک بكه‌ینه‌ پێ و له‌ساته‌وه‌ختێکی وه‌ستاودا دوورترین رێگه‌ی سه‌فه‌ر بگرینه‌ به‌ر..!!؟ ئێمه‌‌ به‌شێک بووین، له‌وه‌همى سه‌ده‌ف و گوێچکه‌‌ ماسییه‌كانى سه‌یرترین سه‌رابى كه‌نارێک له‌هێرۆگلیفییه‌تى توێژاڵه‌ لم.. به‌شێک بووین له‌و شوێن پێیانه‌ى كه‌سیحرى شه‌پۆله‌كان ده‌یانسڕییه‌وه‌.. ئاشناى سه‌یرترین مه‌خلوق و هاوده‌مى عه‌جایبترین باڵنده‌بووین پیاده‌ڕه‌وى، كۆنترین كوچه‌و كۆڵان و شه‌قامى وه‌هم بووین.. كه‌به‌قه‌ده‌رێک چاوه‌ڕوانى تێیدا پیر بووین.. پیر، وه‌ك پیر بوونى دوو چڵه‌ نێرگزى نێرگزه‌ جارِ.. وه‌ك پیر بوونى ئاو و خه‌یاڵ، تاریك و روون; به‌ده‌نگى نه‌و‌ڕه‌سێکی خه‌واڵوو، وه‌ئاگا ده‌هاتین و بێده‌نگ بوونى ده‌ریاش; شه‌وى وه‌بیر ده‌هێناینه‌وه‌و ده‌خه‌وتین.. كه‌شتییه‌ چارۆكه‌داره‌كانى خه‌ونیش، سه‌فه‌رى نێو دنیاى ئۆقیانووسیان پێ ده‌كردین.. هه‌موو رۆژێك، ئێواران.. له‌هه‌مان كه‌نارى سه‌رابه‌وه‌، چاومان ده‌بڕییه‌ زه‌ردترین ئاسۆى.. ساته‌وه‌ختێك له‌نایه‌قینى، پێکه‌وه‌بوونى شێتێتیمان.. پێکه‌وه‌بوونى نامۆترین ساته‌كانى بوونمان!! كه‌پێڵوه‌كانیشمان ماندوو ده‌بوو، ئاسمان له‌نێو ده‌ریاكه‌دا ده‌خه‌وت.. رۆژگارێکمان، به‌بێ چه‌تر.. له‌ژێر بارانى ناوه‌ختى كه‌نار ده‌ریادا برده‌ سه‌ر.. كه‌تا ته‌واو ته‌ڕ نه‌بووینایه‌، هه‌ڵنه‌ده‌ستاین و كه‌نارمان جێ نه‌ده‌هێشت.. ساڵانێکمان به‌بێده‌نگى برده‌ سه‌رو هێنده‌ سه‌رسام بووین، به‌دنیایه‌ك وێنه‌ى په‌رش و بڵاو ده‌نگێك له‌گه‌روومانه‌وه‌ نه‌هاته‌ ده‌رێ و هیچمان نه‌گوت! پێش ئه‌وه‌ى.. دوورترین ڕێگه‌ى سه‌فه‌ر بگرینه‌ به‌ر، دوو ڕه‌شپۆشى كه‌نارێكى سپى بووین؛ له‌هیرۆگلیفییه‌تى توێژاڵه‌ لم.. به‌شێك بووین له‌بوونه‌وه‌ره‌كانى دنیایه‌كى تر... كه‌چى ئێستا پاش ئه‌وه‌ى گه‌یشتینه‌ دوا مه‌نزڵى، دوورترین رێگه‌ى سه‌فه‌ر.. په‌شۆكاو و شپرزه‌، له‌نێو دره‌خته‌ میتاڵییه‌كانى دارستانێكى دوور.. ده‌ڕوانینه‌ یه‌ئسى سه‌رسه‌ختترین سولاله‌ى به‌شه‌ر، كه‌له‌كانزا باڵنده‌كانى دروست ده‌كات و ده‌رگا به‌ردینه‌كانى، له‌رِووى با، داده‌خا.. دنیایه‌كى هه‌یه‌ له‌خه‌ونى تاته‌به‌رد!؟ تۆبڵێى جارێكى دى؟! ژانتا شلۆقه‌كانى زه‌مه‌نێک بپێچینه‌وه‌و نه‌رمترین پێڵاوی رۆژگارێک بكه‌ینه‌ پێ و له‌ساته‌وه‌ختێکی وه‌ستاودا دوورترین ڕێگه‌ی سه‌فه‌ر بگرینه‌ به‌ر...!!؟   (..................!؟) ( بۆ فرمێسكه‌كانى "ره‌نوو" له‌ئێستایه‌كدا، كه‌ئه‌و لێره‌یه‌و من له‌وێ نیم....؟!)   ئه‌گه‌ر هه‌بام، ره‌نگه‌ له‌ودیوى بێمانایى میتاڵه‌كان.. بێمانایى سه‌ماى به‌شه‌ره‌كان بێمانایى ده‌یان راناوى له‌كاركه‌وتوو سه‌دان وشه‌ى كاڵتر په‌یڤێكى كزۆڵه‌بام، كزۆڵه‌ وه‌ك باڵنده‌كانى خه‌یاڵ له‌خۆڵه‌مێشى كوانووه‌كان.. كزۆڵه‌ وه‌ك گه‌نده‌په‌رِى ده‌م با كزۆڵه‌ وه‌ك هه‌موو ئه‌و په‌ناو پاسارانه‌ى كه‌محكومن به‌نه‌مان.. ره‌نگه‌ له‌ودیو هه‌وره‌كانى عه‌ده‌مه‌وه‌ دڵۆپه‌ ده‌نگێكى بێ سه‌دا بام ده‌نگێكى نامۆو سه‌یرو سه‌رسام وه‌ك ده‌نگى بوونه‌وه‌ره‌ خورافییه‌كانى نێو قووڵترین شوێنێكى حیكایه‌ته‌كان.. یان ره‌نگه‌ له‌نێوه‌رِاستى بێ كۆتاترین رێگه‌یه‌كى خۆڵاویى زه‌مه‌ندا، موسافیرێكى سه‌رسام بام.. به‌جانتایه‌كى شرِو به‌پێى په‌تى به‌شوێن دێرینترین ده‌ركه‌ى دنیادا گه‌رِابام تا له‌وێوه‌ بچمه‌ نێو ساردترین ژوورێك كه‌تێیدا ده‌نووسم.. له‌سه‌ر مێزه‌ به‌ردینه‌كه‌م، خۆم ببینمه‌وه‌ كه‌ده‌رِوانمه‌ هه‌زاران وشه‌ى ره‌دووكه‌وتوو.. سه‌دان دێرى چه‌واشه‌و بارێ وێرگول و نیشانه‌ى سه‌یرو سه‌مه‌ره‌ خۆم ببینمه‌وه‌ له‌به‌رده‌م ته‌ڵخترین ئاوێنه‌ى ته‌مه‌نێك له‌دزێوى، گه‌ڵا ده‌ستكرده‌كان، لك و پۆپه‌ خه‌واڵووه‌كان ئاوێنه‌ى هه‌زار پارچه‌.. له‌رووكارى سولاله‌یه‌ك له‌توخمى خۆم خۆم ببینمه‌وه‌ له‌نیَو سه‌دان حیكایه‌تى ئیبلیسه‌كان سه‌رگوزشته‌ى سۆزانى و بازرگانه‌كان ماجه‌راى هه‌ژارترین گوێچكه‌ماسى گه‌وره‌ترین مروارى و باڵابه‌رزترین باڵنده‌ تاله‌وێوه‌ برِوانمه‌ ساردترین ژوورێكى بوون كه‌من له‌وێدا نیم ئه‌گه‌ر هه‌بام.. ره‌نگه‌ له‌ودیو ره‌نگى چاوه‌كانى تۆوه‌ بێرِه‌نگترین بوونه‌وه‌ر بام، به‌پیرترین دره‌ختى دارستانێك چووبام كه‌ باڵنده‌كانى ده‌مێك ساڵه‌ له‌ نێو كۆنترین كتێبى دنیادا خه‌ووتوون كتێبێك كه‌ رۆحى خاك و خۆلى عه‌رده‌كه‌ى وه‌ك عیفرتێك له‌ نێو گچكه‌ترین شووشه‌ى دنیادا ده‌ست به‌سه‌ره‌ ئه‌گه‌ر هه‌بام.. ره‌نگه‌ له‌ دوورترین دوورگه‌ى دنیادا كه‌ هێشتاكه‌ نه‌چۆته‌ نێو تانوپۆى حیكایه‌ته‌كان په‌ناهه‌نده‌یه‌كى به‌دبه‌ختى ساته‌ ناشیرینه‌كانى زه‌مه‌ن بام ئه‌گه‌ر هه‌بام به‌بێ چه‌تر به‌ژێر لێزمه‌ى باراندا ره‌ت ده‌بووم و ته‌رِنه‌ده‌بووم بێ باكانه‌ به‌شه‌قامه‌كاندا ده‌گه‌رِام بێ ترس له‌گریانى شه‌یتانه‌كان ورد ده‌بوومه‌وه‌ به‌بێ هه‌ڵكێشانى قووڵترین هه‌ناسه‌ى حه‌سره‌ت به‌بێ هه‌ڵرشتنى وشكترین دڵۆپه‌ فرمێسك تۆم جێ ده‌هێشت ئه‌گه‌ر هه‌بام وه‌ك هه‌موو بنیاده‌مێك له‌شوێنێكى زه‌مه‌ندا رانه‌ده‌وه‌ستام خه‌ونم به‌سه‌دان خه‌ونى هه‌ڵوه‌ریوى پایزانه‌وه‌ نه‌ده‌بینى له‌هه‌مان ساته‌وه‌ختى له‌دایك بوونمدا له‌دایك نه‌ده‌بووم هه‌مان رۆژى مردنیشم هه‌ڵنه‌ده‌بژارد ئه‌گه‌ر هه‌بام.. نه‌تۆم ده‌ناسى و نه‌ئه‌و و نه‌خۆم به‌نێو تراژیدیاى هه‌زاران ساڵى زه‌خره‌فه‌كاندا هه‌ڵنه‌ده‌گه‌رِام وێنه‌ى خۆمم له‌سه‌ر روخسارى ئاو نه‌ده‌كێشا له‌دار تێلى شه‌قامه‌ نه‌بووه‌كان رانه‌ده‌مام نه‌مده‌رِوانییه‌ حوزنى په‌روانه‌كان له‌ئه‌ستێره‌كان توورِه‌ نه‌ده‌بووم به‌یته‌ غه‌زه‌لییه‌كانم بۆ مانگ نه‌ده‌نارد گالیسكه‌ كۆنه‌كانى سۆمه‌رم نه‌ده‌هێنایه‌ نێو شه‌قامه‌كانى شاره‌وه‌ به‌هیرۆگلیفى حیكایه‌تى خۆمم نه‌ده‌نووسییه‌وه‌ بێگومان ئه‌گه‌ر هه‌بام له‌نێو هیچ ساتێكى ئه‌م زه‌مه‌نه‌دا نه‌ده‌بووم له‌هیچ تۆبۆگرافیایه‌كى شوێنه‌كانیدا نه‌ده‌گه‌رِام .......................... ......!!! .........................!!!

“ناشوێن”

من له‌كوێم
له‌به‌ر ده‌ركه‌ى كام سه‌فه‌را
زه‌لیلم وه‌ك زه‌لیلیى ئاو
بۆ گه‌رمه‌تاوێك بمباته‌وه‌ بۆ ئاسمان
تا له‌باوه‌شى هه‌ورا
بیر له‌بارینى دڵۆپه‌كان بكه‌مه‌وه‌
چاوه‌ڕێم
چاوه‌ڕێى كام قه‌ده‌رم
جوانتر بێ له‌قه‌ده‌رى حه‌رفه‌كانى وه‌هم
سه‌یرتربێ له‌وشه‌كانى با
قوڵتربێ له‌ده‌روونى شێته‌كانى به‌هه‌شت
من چاوه‌ڕێى چیم
بۆ بینینى چ په‌لكه‌زێڕینه‌یه‌ك راوه‌ستاوم
بیر له‌ چ گه‌ردوونێكى بێ ئه‌ستێره‌ ده‌كه‌مه‌وه‌
خه‌ون به‌رووكارى چ كتێبێكه‌وه‌ ده‌بینم
پڕبێت له‌سیحرى پاساژه‌كانى مێخه‌ك
نغرۆ بێت له‌بۆنى مه‌مكۆڵانى كچۆڵانى خه‌ون
من چاوه‌ڕێى چیم
بۆ تینووم وه‌ك باڵنده‌ بێپه‌ڕه‌كانى دۆزه‌خ
ماندووم وه‌ك جه‌للاده‌كانى حه‌قیقه‌ت
سووتاوم وه‌ك ده‌نكه‌كانى هه‌نار
من له‌كوێم
له‌ كۆریدۆره‌كانى كام مێژووا
تێكه‌ڵ به‌بۆنى نۆستالژیاى كام رۆژگارێ
له‌دواى كام كاروانێ و
له‌پاڵ كام چه‌ته‌ و پیاوكوژ و بازرگانێكا
له‌ پاساژه‌كانى كام زه‌مه‌نا
له‌نێو كام باوه‌ڵ و سه‌رداب و پێچوپه‌ناى
كۆشكه‌كانى خه‌یاڵا بۆ وێنه‌یه‌كى
لێكچوو به‌خۆم ده‌گه‌ڕێم
له‌ چ ئان و ساتێكا
بۆ بینینى چركه‌ و خوله‌ك و كاژێرى
یه‌كه‌مین كاتژمێرى لم ده‌گه‌ڕێم
من له‌كوێم
كام تۆپۆگرافیایه‌
كام پانتایى جوگرافیایه‌
كام كون و كه‌له‌به‌رى شوێنه‌
من له‌نێویا هه‌م
من له‌كوێم
له‌كام سه‌رابستانا تینووم
له‌كام نه‌خشه‌دا بۆ ئاو ده‌گه‌ڕێم
ئاوێكى زه‌لیل وه‌ك خۆم
چه‌واشه‌ى چ به‌هه‌شتێكم كه‌نایبینم
تا ده‌م بنێمه‌ رووباره‌ سه‌یره‌كانى
تا تێر ئاوبم له‌ زنه‌ و كانییه‌كانى
نایبینم
تا سه‌رسامبم به‌بینینى حۆرییه‌كانى
خه‌فه‌ت بۆ غولمانه‌كانى بخۆم
سڵاو له‌به‌هه‌شتییه‌كان بكه‌م
هه‌واڵى بێزارییان ببیستم
من له‌كوێم
له‌ده‌ره‌وه‌ى كام شوێن بۆ شوێن ده‌گه‌ڕێم
تاجه‌سته‌ى قوڕاویم
له‌ ژێر بارانیا بشۆمه‌وه‌
من له‌كوێم
تا بۆ ناشوێنێك بگه‌ڕێم
نه‌فره‌تى سولایه‌ك له‌به‌شه‌رى
له‌خۆم نه‌رمترى
تیا بنێژم
تا گوڵه‌ وشكه‌كانى تیا بچێنم
ئه‌و گوڵانه‌ى به‌هه‌ڵمژینى
بۆن خوێنى كوژراوه‌كانى عه‌ده‌م
دوا هه‌ناسه‌یاندا و مردن
ده‌بێت ئه‌و گوڵانه‌ ئاوده‌م به‌فرمێسكى
هه‌موو ئه‌و دیناسۆرانه‌ى په‌شیمانن
له‌به‌جێهێشتنى زه‌وى بۆ ئێمه‌ى به‌شه‌ر
ئێمه‌یه‌ك له‌وان دڕتر، له‌وان شێتتر
له‌وان كڵۆڵتر و به‌دبه‌ختتر
ئێمه‌یه‌ك كه‌نازانین نه‌وه‌ى كێین
نه‌وه‌ى ئاده‌م و حه‌وایه‌ك له‌تاوان
كه‌خالیق ویستى زه‌مین
به‌وان بكاته‌ گۆمێك له‌ خوێن
یان نه‌وه‌ى گۆریلا داماوه‌كانى جه‌نگه‌ڵ
من له‌كوێم
له‌كام ده‌ریادا بۆ حۆرییه‌كانى ده‌ریا
ده‌گه‌ڕێم
تا ده‌م بنێم به‌لێویانه‌وه‌ و
له‌واتاى چرپه‌ بگه‌م
له‌كام دوورگه‌دا گوێ بۆ ده‌نگى
باڵنده‌كانى سیحر راده‌گرم
تا پاش ئه‌وان هیچ نه‌ڵێم
من له‌كوێم
له‌سه‌ر ئه‌م زه‌مینه‌م یان له‌شوێنێكى دى
ئه‌ى ئه‌گه‌ر لێره‌م
بۆ هه‌لوه‌سه‌ى بینینى زه‌مینێكمه‌ له‌خۆڵ
له‌ئاو، له‌به‌رد، له‌ هه‌موو ناوهاتووه‌كانى
نێو كتێبه‌كانى بایۆلۆژیا
بۆ هستریامه‌ بۆ دۆزینه‌وه‌ى
یه‌كه‌مین شوێن پێى مرۆڤێك
له‌تان و پۆكانى شوێن
كام شوێنه‌ ئه‌وداڵیم
ئه‌و شوێنه‌ى كه‌خالیق دروستیكرد
یان ئه‌و شوێنه‌ى پێش ئه‌ویش هه‌ر هه‌بوو
كام شوێنه‌ سه‌وداسه‌رى بینینیم
ئه‌و شوێنه‌ى به‌ردمانكرده‌
سه‌ره‌تاى ئه‌وه‌ى ئێستا
به‌رد بارانمان ده‌كا
یان ئه‌و شوێنه‌ى قوڕمان تیاكرده‌
سه‌ره‌تاى حیكایه‌تاكان
تا هه‌موو حیكایه‌ته‌كانمان له‌قوڕهه‌ڵشێلین
كام شوێن
ئه‌و شوێنه‌ى زمانمان تیا پژا
به‌سه‌رجه‌م ئاوه‌ڵناوه‌كانى جه‌هل
ئه‌و شوێنه‌ى بۆ یه‌كه‌مجار
خوێنى ئاژه‌ڵه‌كانمان
تیاكرده‌ یه‌كه‌مین وێنه‌كانى
سه‌ر دیوارى ئه‌شكه‌وت
ئه‌و شوێنه‌ى هێنده‌ى قووڵایى زه‌مه‌ن
یه‌كترمان تیا ئه‌تكرد و
پڕبه‌دڵى خۆمان سوارى
ئه‌ندێشه‌ى هه‌موو ئه‌وانه‌ بووین
كه‌ له‌ئێمه‌ ده‌چوون
یان ئه‌و شوێنه‌ى
به‌شێكه‌ له‌خه‌یاڵى نه‌وه‌یه‌ك
له‌مردووه‌كانى ناشوێن
به‌شێكه‌ له‌خه‌یاڵى ره‌وێك
له‌ حه‌یوانه‌كانى ئه‌زه‌ل
من له‌كوێم
له‌ چ شوێنێكا خه‌وتووم
خه‌ون به‌چ نه‌هامه‌تییه‌كى دیكه‌ى
سیماى ئاگره‌وه‌ ده‌بینم
سه‌یرى كام دۆزه‌خ ده‌كه‌م
كه‌ گوناهه‌كانم ناگرێته‌ خۆى
بیر له‌چ كوفرێك ده‌كه‌مه‌وه‌
تا ده‌ركه‌كانى ئه‌و دۆزه‌خه‌م
بۆ بخرێته‌ سه‌ر پشت
حه‌زم به‌بینینى كام زه‌بانییه‌و
جه‌للاد و ئه‌ژده‌هاى
پشتى ئه‌و دۆزه‌خه‌یه‌
تا هێنده‌ تینووى بینینى بم
نازانم له‌كام رێگه‌وه‌ بچمه‌وه‌ سه‌رى
تا له‌به‌هه‌شتى ئه‌م دنیایه‌ هه‌ڵبێم
كام رێگه‌ى تاوان بگرمه‌ به‌ر
شه‌ڕ به‌كامه‌ ئه‌فسانه‌ بفرۆشم
له‌گه‌ڵ كام داستان بجه‌نگێم
نه‌فره‌ت له‌كام فریشته‌ بكه‌م
كام خوداوه‌ند له‌خۆم تووڕه‌بكه‌م
نازانم له‌كام مێژووه‌وه‌ ده‌ست پێبكه‌م
ببمه‌ فه‌رماندارى كام سوپاى خوێناوى
سه‌فه‌ر به‌كام رێگه‌ى كوشنده‌یا بكه‌م
له‌كه‌لله‌سه‌رى كام میلله‌ت
قه‌ڵا و قووله‌ دروست بكه‌م
وێنه‌ى كام جه‌نگاوه‌ر به‌رزكه‌مه‌وه‌
له‌گه‌ڵ كامیان ببمه‌ هاوڕێ
بچمه‌ سه‌ردانى كامیان
له‌حزوورى كامیانا بنووشتێمه‌وه‌
نازانم له‌جه‌نگیزخانه‌وه‌ ده‌ست پێبكه‌م
یان له‌و كۆنتر بكه‌مه‌ هاوڕێى
سه‌فه‌رى قڕكردنى به‌شه‌ر
نازانم به‌هه‌مان رێگه‌ى ئه‌وانا ره‌وبكه‌م
یان ئه‌وانیش له‌گه‌ڵ خۆم به‌رمه‌
سه‌مه‌رقه‌ند، دواتر بوخارا و هیند
پاش زه‌مه‌نێكیش له‌رێكردن بیانبه‌مه‌
سه‌ر شوێنى سڕدراوه‌ى كارتاج
یان هه‌ر لێره‌وه‌ ده‌ست پێبكه‌م
له‌شوێنجێگه‌ى زامه‌كانى
هه‌موو ئه‌و مرۆڤانه‌ى بۆ بینینى خوا
وه‌ك هیچێتى دنیا توانه‌وه‌
وه‌ك هه‌موو ئه‌وانه‌ى
وه‌ك حه‌للاج
له‌رێگه‌ى دۆزینه‌وه‌ى خوایا
خۆیان له‌نێو سه‌جع و ره‌وانبێژى عه‌ده‌ما
له‌رۆژگارێكى خۆڵاویا له‌بیرچوو
به‌ڵام هه‌ر رۆیشتن
تابوونه‌ هه‌ڵم و ته‌م و هه‌ور
بوونه‌ باران بۆ هه‌موو
ئه‌و زه‌وییانه‌ى كه‌نه‌بوون
بوونه‌ خه‌یاڵى قوربانییه‌كى ماسۆشى
كه‌به‌شوێن سادییه‌تى جه‌للادێكا ده‌گه‌ڕێ
كه‌خۆى نه‌مابێت و بووبێته‌ ته‌ور
بووبێته‌ نه‌فره‌ت و رك
تاوه‌ك ئه‌و فریشته‌یه‌ى رۆح ده‌كێشێت
رۆحیان بكێشێت
نازانم له‌كوێوه‌ ده‌ستپێبكه‌م
له‌كام كیشوه‌ره‌وه‌ رێگه‌ بگرمه‌به‌ر
له‌كام ده‌ریاوه‌ سه‌فه‌ر بكه‌م
كام توخمى به‌شه‌ر
بكه‌مه‌ هاوڕێى سه‌فه‌ر
بگه‌مه‌ چه‌ند به‌نده‌رو
له‌نێو گه‌ڵى چه‌ند سۆزانیا بخه‌وم
بۆنى سنگى كامیان
له‌گه‌ڵ خۆم بێنم
یاده‌وه‌ریه‌كانى كامیان
بخه‌مه‌ پریاسكه‌ى سه‌فه‌رم
بیر له‌نێوگه‌ڵى كامیان بكه‌مه‌وه‌
چاوى شه‌هوانى كامیان
بكه‌مه‌ فیگورى حه‌زى شێتانه‌م
بۆ كام دڵۆپه‌ سپێرمم
حیكایه‌تى دۆڕانى ئه‌وان بگێڕمه‌وه‌
وێنه‌ى ئاڵۆشاوییانه‌ى كامیان بهێنمه‌وه‌
تا هه‌موومان له‌ماناكانى یه‌ئس بگه‌ین
حه‌ز له‌كامیان بكه‌م و
كامیان له‌ویتریان جوداتر ببینم
من له‌كوێم
له‌كام شوێنى ئه‌م دنیایه‌
بۆ تۆ بگه‌ڕێم و
نه‌تدۆزمه‌وه‌

 

 

 

 

مافي ئةم ساييتة ثارصزراوة بؤ ئاراس©2006