ژووری هه‌وال / داركۆ سعید

 تازه‌ کراوه‌ته‌وه‌ له‌ ڕۆژی05/ 01/ 2012

&&&&&&&&&&&&&&&&&&&&&&&&&&

مالیكی و نوجێفی و خوزاعی له‌سه‌ر چاره‌سه‌ری كێشه‌كان رێكه‌وتن
 

به‌ پێی هه‌واڵێكی سایتی (سومه‌ریه‌نیوز) خوزه‌یر خوزاعی جێگری سه‌رۆك كۆماری عێراق رایگه‌یاندوه‌ له‌گه‌ڵ ئوسامه‌ نوجێفی سه‌رۆكی ئه‌نجومه‌نی نوێنه‌ران و نوری مالیكی سه‌رۆك وه‌زیران، گه‌یشتونه‌نه‌ رێككه‌وتن له‌سه‌ر دروستكردنی لێژنه‌یه‌ك بۆ چاره‌سه‌ركردنی كێشه‌ هه‌ڵواسراوه‌كانی عێراق.
له‌ به‌یاننامه‌یه‌كدا، جێگری سه‌رۆك كۆمار رایگه‌یاندوه‌، كه‌ كه‌شی كۆبونه‌وه‌كه‌ ئیجابی و باش بوه، به‌راشكاوانه‌ رێكه‌وتون كه‌ لیژنه‌یه‌كی هاوبه‌ش بۆ چاره‌سه‌ری كێشه‌كان پێكبهێنرێت.
خوزاعی ئاماژه‌ی به‌وه‌شكردوه‌، كه‌ رێكه‌وتون كه‌ هاوكاری كۆنگره‌ی نیشتمانی بكه‌ن كه‌له‌سه‌ر داوای جه‌لال تاڵه‌بانی سه‌رۆك كۆماری عێراق ده‌به‌سترێت له‌چه‌ند رۆژی داهاتود،ا بۆ گه‌ڕانه‌وه‌ی لیستی عێراقیه‌ بۆ ناو پرۆسه‌ی سیاسی

&&&&&&&&&&&&&&&&&&&&&&&&&&&

وارماوه‌: گه‌نجێك خۆی‌ ده‌خنكێنێت

  سه‌رچاوه‌یه‌ك له‌به‌رێوه‌به‌رایه‌تی‌ پۆلیسی‌ قه‌زای‌ شاره‌زووره‌وه‌ ئه‌مرۆ (پێنچشه‌ممه)‌، ئه‌وه‌ی‌ بۆ سایتی‌ ئاوێنه‌ ڕونكرده‌وه‌ كه‌ "كاتژمێر 12ی‌ شه‌وی‌ رابردوو ئاگادار كراینه‌وه‌ كه‌ گه‌نجێك خۆی‌ خنكاندووه‌".


سه‌رچاوه‌یه‌كه‌ی‌ به‌رێوه‌به‌رایه‌تی‌ پۆلیسی‌ قه‌زای‌ شاره‌زوور وتیشی‌ "گه‌نجه‌كه‌ ته‌مه‌نی‌ 25 ساڵه‌‌و ناوی‌ (ك.ئـ)یه‌‌و پیشه‌ی‌ خوێنكاری‌ خوێندنگای‌ ئێوارانه‌.


سه‌رچاوه‌كه‌ ئاماژه‌ی‌ بۆ ئه‌وه‌شكرد كه‌ لێكۆڵینه‌وه‌ له‌ڕووداوه‌كه‌ ده‌ستی‌ پێكردووه‌.


سایتی‌ ئاوێنه‌ هه‌وڵیدا زانیاری‌ زیاتر له‌باره‌ی‌ ڕووداوه‌كه‌وه‌ له‌به‌رێوه‌به‌رایه‌تی‌ پۆلیسی‌ قه‌زای‌ شاره‌زوور وه‌ربگرێت، به‌ڵام به‌رپرسانی‌ ئه‌و بنكه‌یه‌ ئاماده‌ نه‌بون هیچ لێدوانێك له‌و باره‌یه‌وه‌ بده‌ن
 

&&&&&&&&&&&&&&&&&&&&&&&&&&&

سلێمانی‌: 9 كه‌س به‌هۆی‌ ئایدزه‌وه‌ ڕه‌وانه‌ی‌ وڵاته‌كانیان ده‌كرێنه‌وه‌

 

 له‌كۆنگره‌یه‌كی‌ ڕۆژنامه‌وانیدا كه‌ ئه‌مڕۆ (پێنچشه‌ممه‌)، له‌شاری‌ سلێمانی‌ به‌رێوه‌چوو، به‌ڕێوه‌به‌ری‌ نیشینگه‌ی‌ سلێمانی‌، عه‌مید سالار عبدالله‌ ڕایگه‌یاند " به‌هۆی‌ بونی‌ كه‌شێكی‌ ئارام له‌هه‌رێمی‌ كوردستان، له‌ساڵی‌ 2011دا ڕێژه‌ی‌ سه‌ردانیكردنی‌ هاوڵاتی‌ بیانی بۆ شاری‌ سلێمانی‌ زیادی‌ كردووه‌ به‌ به‌راورد به‌ساڵی‌ 2010".


عه‌مید سالار وتیشی‌ "له‌ساڵی‌ 2011دا له‌سه‌رجه‌م خاڵه‌ سنورییه‌كانی‌ پارێزگای‌ سلێمانییه‌وه‌ ملیۆنێك و 339 هه‌زار بیانی‌ هاتونه‌ته‌ شاری‌ سلێمانی‌، به‌ڵام له‌ساڵی‌ 2010 دا ته‌نها 373 هه‌زار كه‌سبووه‌".


سه‌باره‌ت به‌ ڕێژه‌ی‌ هاتو چۆكردنی‌ ئۆتۆمبێل له‌ مه‌رزه‌كانه‌وه‌ ناوبراو ئاماژه‌ی‌ به‌وه‌دا "له‌ساڵی‌ 2011 له‌مه‌رزه‌كانه‌وه‌ 308 هه‌زار ئۆتۆمبێل هاتۆته‌ ناو شاری‌ سلێمانی‌ یاخود له‌شاری‌ سلێمانییه‌وه‌ چۆته‌ ده‌ره‌وه‌".


سه‌باره‌ت به‌پشكنینی‌ خوێنی‌ ئه‌و بیانیانه‌ی‌ له‌ناو به‌ڕێوه‌به‌رایه‌تی نشینگه‌ی‌ سلێمانی‌ بۆیان ئه‌نجامدراوه‌، به‌ڕێوه‌به‌ری‌ نیشینگه‌ی‌ سلێمانی‌ وتی‌ " له‌ساڵی‌ ڕابردوودا توانراوه‌ 9 كه‌س كه‌ نه‌خۆشی‌ ئایدزیان هه‌بووه‌ بیان گه‌ڕێننه‌وه‌ بۆ وڵاته‌كانی‌ خۆیان، هه‌روه‌ها 387 كه‌سی دیكه‌ش كه‌ نه‌خۆشی‌ درێژ خایه‌نیان هه‌بووه‌‌و گه‌ڕێنراونه‌ته‌وه‌ بۆ ئه‌و وڵاتانه‌ی‌ لێوه‌ی‌ هاتوون‌و كۆی‌ گشتی‌ ئه‌و كه‌سانه‌ی‌ به‌هۆی‌ توشبونیان به‌نه‌خۆشی‌ درێژخایه‌نه‌وه‌ ڕه‌وانه‌ی‌ وڵاته‌كانیان كراونه‌ته‌وه‌ 449 كه‌ بووه‌".


عه‌مید سالار ئاماژه‌ی‌ به‌وه‌شدا كه‌ له‌ساڵی‌ ڕابردوودا 886 هاوڵاتی‌ بیانی‌ سنورداشی‌ وڵاته‌كانیان كراونه‌ته‌وه‌و هه‌زار‌و 16 هاوڵاتی‌ كوردیش له‌وڵاتانی‌ ئه‌وروپاوه‌ گه‌ڕاونه‌ته‌وه‌ بۆ هه‌رێمی‌ كوردستان.

 

&&&&&&&&&&&&&&&&&&&&&&&&&&&&&&&&

گه‌رمیان: دژی كۆمه‌ڵكوژیه‌كه‌ی شیرناخ گردبونه‌وه‌یه‌ك رێكخرا

به‌شداری‌ (20) رێكخراوی‌ كۆمه‌ڵی‌ مه‌ده‌نی‌ و رێكخراوی كورته‌بالاَكانی‌ گه‌رمیان و ژماره‌یه‌كی زۆر له‌ چین و تویژه‌كانی‌ گه‌رمیان به‌ دروشمی‌ ( شیرناخ هه‌ڵه‌بجه‌یه‌.. كوردستان یه‌ك پارچه‌یه‌) له‌ گردبونه‌وه‌یه‌كدا ئیدانه‌ی‌ كۆمه‌ڵكوژییه‌كه‌ی‌ شیرناخی‌ باكوری‌ كوردستانیان كرد.
خۆپیشانده‌ران له‌ به‌یاننامه‌یه‌كیشدا داوایانكرد له‌ به‌رامبه‌ر كوشتنی هاوڵاتیانی كورد  بنكه‌ سه‌ربازی و كۆمپانیاكانی توركیا له‌ هه‌رێمی كوردستان ده‌ربكرێن.
له‌ خۆپیشاندانه‌كه‌دا به‌ توندی ئیدانه‌ی كۆمه‌ڵكوژیه‌كه‌ی شیرناخ كرا و له‌لایه‌ن خۆپیشانده‌رانه‌وه‌ وێنه‌ی ره‌جه‌ب ته‌یب ئه‌ردۆگان، سه‌رۆك وه‌زیرانی توركیا سوتێنرا

&&&&&&&&&&&&&&&&&&&&&&&&&&&

هاشمی: ئه‌گه‌ر تاوانێکم کردبێت مالکیش له‌گه‌ڵم شه‌ریکه
 

تارق هاشمی" جێگری سه‌رۆک کۆماری عێراق سه‌باره‌ت به‌م کێشانه‌ی ئه‌م دواییه‌ی عێراق و ده‌رچوونی فه‌رمانی ده‌ستگیر کردنی ده‌ڵێت، "تاوانبار کردنم به‌وه‌ی له پشت کرده تیرۆریستییه‌کان بوومه، له راستیدا ئاماژه‌یه به‌وه‌ی که سه‌رۆکی حکومه‌تیش تێیدا به‌شداره." تارق هاشمی له گفتوگۆیه‌دا له‌گه‌ڵ رۆژنامه‌ی "نیوز ویک"ی ئه‌مه‌ریکایی رایگه‌یاند: ئه‌گه‌ر گرووپێکی کوشتنم دامه‌زراندبێت و سێ ساڵیشه سه‌رۆکی حکومه‌ت(نوری مالکی) لێی ئاگاداره، بۆچی پێشی نه‌گرتم."
هاشمی، نوری مالکیی به‌وه تۆمه‌تبار کرد که ئه‌م هه‌وڵانه‌ی ئه‌م دواییه‌ی بۆ ئه‌وه‌یه، لایه‌نه سیاسییه‌کان وه‌لابنێت و خۆی به ته‌نیا له گۆڕه‌پانی سیاسیی عێراق بمێنێته‌وه.جێگری سه‌رۆک کۆماری عێراق ده‌ڵێت، مالکی ورده ورده ده‌بێته مه‌ترسییه‌ک بۆ سوننه‌کانی عێراق و ئه‌گه‌ر سه‌رۆکایه‌تیی حکومه‌ته‌که‌ی به‌رده‌وام بێت، ئه‌وه به جددی بیر له پێکهێنانی هه‌رێمێکی خودموختار ده‌که‌نه‌وه.
تارق هاشمی هه‌روه‌ها گله‌یی له ئه‌مه‌ریکاییه‌کان کرد که رێک له‌و کاته‌ی عێراق که‌وته ناو کێشه‌کان، ئه‌م وڵاته‌یان جێ‌هێشت، له‌و کاته‌ی هێشتا عێراقییه‌کان توانای چاره‌سه‌ر کردنی کێشه‌کانیان نه‌بوو و ئه‌وان(ئه‌مه‌ریکاییه‌کان) له‌و کاته‌ی کار له کار ترازابوو، عێراقیان جێ‌هێشت.هاشمی هه‌روه‌ها داوای کرد، گۆڕینی مالکی، له به‌رژه‌وه‌ندیی هه‌موو عێراقییه‌کان دایه و ده‌کرێت بگه‌یه‌نه ئاشتی له‌گه‌ڵ هه‌رکه‌سێکی دیکه له لیستی هاوپه‌یمانیی نیشتمانی.جێگری سه‌رۆک کۆماری عێراق هه‌روه‌ها جه‌ختی کرده‌وه، به‌ڵام ده‌بێت ئه‌وه‌ی له شوێنی مالکی داده‌نرێت، که‌سێکی پابه‌ند به ده‌ستوور بێت و باوه‌ڕی به حکومه‌تێکی دامه‌زراوه‌یی و دابه‌ش کردنی دادپه‌روه‌رانه‌ی ده‌سه‌ڵات هه‌بێت

&&&&&&&&&&&&&&&&&&&&&&&&&&&&

هه‌رێمی كوردستان؛ له‌ (2011) دا (56) كه‌س بونه‌ته‌ قوربانی مین

به‌پێ‌ ی‌ ئامارێكی‌ ده‌زگای‌ گشتی‌ كاروباری‌ مین له‌ساڵی‌ (2011) دا (56) كه‌س بونه‌ته‌ قوربانی‌ مین و ته‌قه‌مه‌نی‌، زۆرترین روداویش له‌ پارێزگای‌ سلێمانی‌ بوه‌.
ئاكۆ عه‌زیز، به‌ڕێوه‌به‌ری‌ به‌شی‌ راگه‌یاندن له‌ ده‌زگای‌ گشتی‌ كاروباری‌ مین له‌ سنوری‌ پارێزگای‌ هه‌ولێر به‌ (سبه‌ی‌) راگه‌یاند له‌ساڵی‌ (2011)دا (56) كه‌س له‌ هه‌رێمی كوردستاندا بونه‌ته‌ قوربانی‌ مین و ته‌قه‌مه‌نی‌، له‌و رێژه‌یه‌ش (15) كه‌سیان گیانیان له‌ ده‌ستداوه‌و (41) یش بریندابون.
ئاماژه‌ی به‌وه‌شكرد، له‌سنوری پارێزگای سلێمانی و گه‌رمیانیش  (40) قوربانی هه‌بوه‌ كه‌ (10) یان گیانیان له‌ده‌ستداوه‌و (30) كه‌سیشیان برینداربون، (16) قوربانیش له‌ سنوری پارێزگاكانی هه‌ولێر و دهۆك بون كه‌ (5) یان گیانیان له‌ده‌ستداوه‌.
ئاكۆ عه‌زیز، هۆكاری زۆربه‌ی روداوه‌كانی گه‌ڕانده‌وه‌ بۆ ده‌ستكاریكردنی مین و ته‌قه‌مه‌نی ‌و قوربانیه‌كانی پارێزگای سلێمانیش زۆرینه‌یان له‌ گه‌رمیان بون و ئه‌وانه‌ی هه‌ولێریش له‌ سنوری سۆران و هه‌ریر و له‌ دهۆكیش زۆرترینیان له‌ قه‌زای به‌رده‌ره‌ش بوه‌

&&&&&&&&&&&&&&&&&&&&&&&&&&&&

یه‌كێتی زانایان بۆ مامۆستایانی ئاینی: به‌شداری به‌رنامه‌ی (به‌بوێری) كه‌ناڵی NRT مه‌كه‌ن

مه‌كته‌بی ته‌نفیزی یه‌كێتی زانایانی ئایینی ئیسلامی كوردستان له‌به‌یاننامه‌یه‌كیدا داوا له‌مامۆستایانی ئاینی ده‌كات به‌شداریی له‌به‌رنامه‌ی (به‌بوێری) كه‌ناڵی ئاسمانی NRTدا نه‌كه‌ن، به‌بیانووی ئه‌وه‌ی ئه‌و كه‌ناڵه‌ له‌ رێگه‌ی ئه‌وبه‌رنامه‌یه‌وه‌ “كار بۆ لێدانی ئیسلام‌و گومان دروستكردن ده‌كات”.

ده‌قی به‌یاننامه‌كه‌:

یه‌كێتی زانایان روونكردنه‌وه‌یه‌ك له‌سه‌ر به‌رنامه‌یه‌كی كه‌ناڵی ئێن ئار تی بڵاوده‌كاته‌وه‌

به‌ناوی خوای گه‌وره‌‌و میهره‌بان

مامۆستایانی ئایینی قه‌در گران..

هاووڵاتیانی خۆشه‌ویست:

دوای ئه‌وه‌ی كه‌ناڵی ئاسمانی (NRT) ده‌ستی به‌ به‌رنامه‌كانی كرد، ئێمه‌ وه‌ك كه‌ناڵێكی سه‌ربه‌خۆ‌و بێلایه‌ن ته‌ماشامان كرد، به‌ڵام دوای ماوه‌یه‌ك بۆمان ده‌ركه‌وت، ئه‌م كه‌ناڵه‌ له‌ رێگه‌ی به‌رنامه‌ی (به‌ بوێری) كار بۆ لێدانی ئیسلام‌و گومان دروستكردن ده‌كات، ئه‌وه‌ش وایكردووه‌، رۆژانه‌ خه‌ڵك به‌ ته‌له‌فۆن په‌یوه‌ندیمان پێوه‌ بكه‌ن‌و سه‌ردانمان بكه‌ن، ئێمه‌ش بۆ رێزگرتن له‌ كه‌ناڵه‌كه‌ نووسراوێكمان بۆ كه‌ناڵه‌كه‌ نارد، تێیدا داوای راگرتنی به‌رنامه‌كه‌مان كرد، یان گۆڕانكاری تێدا بكرێت، به‌ شێوه‌یه‌ك به‌رنامه‌كه‌ كار بۆ لابردنی گومان بكات، ئه‌وانیش به‌ ره‌سمی به‌ڵێنی ئه‌وه‌یان پێداین، به‌ڵام كه‌ناڵه‌كه‌ تا ئێستا له‌سه‌ر شێوازی خۆی به‌رده‌وامه‌، ئێمه‌ش رۆژانه‌ خه‌ڵك له‌ سه‌رتاسه‌ری كوردستان په‌یوه‌ندیمان پێوه‌ ده‌كه‌ن، هه‌روه‌ها ئه‌و باسانه‌ هه‌موویان له‌ دوو توێی كتێبه‌كان وه‌ڵامیان دراوه‌ته‌وه‌، به‌ڵام به‌رنامه‌كه‌ ئه‌وه‌نده‌ی قه‌ناعه‌تی به‌ گومانه‌كان دێت، كار بۆ گه‌یشتنه‌ ئه‌نجام ناكات، وا دیاره‌ ئه‌وه‌نده‌ی كار بۆ لێدانی ئایین ده‌كات، ئه‌وه‌نده‌ كار بۆ گه‌ییشتنه‌ راسته‌قینه‌ ناكات، ئه‌وه‌ی له‌و كه‌ناڵه‌ ده‌كرێت له‌ هیچ كه‌ناڵێكی وڵاتانی ئیسلامی ناكرێت، جگه‌ له‌و كه‌ناڵانه‌ی تایبه‌تن به‌ دژایه‌تی ئیسلام.

بۆیه‌ لێره‌وه‌ داوا له‌ مامۆستایانی ئایینی‌و وتاربێژان‌و بانگخوازان ده‌كه‌ین، به‌ هیچ شێوه‌یه‌ك به‌شداری ئه‌و به‌رنامه‌یه‌ نه‌كه‌ن‌و، كاتی خۆیان به‌فیڕۆ نه‌ده‌ن له‌ شتێك، كه‌ ئامانجێكی لێڵی له‌ پشته‌وه‌یه‌.

مه‌كته‌بی ته‌نفیزی
یه‌كێتی زانایانی ئایینی ئیسلامی كوردستان

 

ا&&&&&&&&&&&&&&&&&&&&&&&&&&&&

سه‌رچاوه‌کان، سایتی سبه‌ی ....سایتی ئاوێنه‌ ....هاولاتی

مافي ئةم ساييتة ثارصزراوة بؤ ئاراس©2006